رمضان
12 أغسطس, 2010
أهنئ جميع قراء ماعونيات بمقدم رمضان تقبل الله منا ومنكم فيه صالح الأعمال.
يأتي رمضان هذا العام في أغسطس أشد أيام السنه حرارة . وهذا ما يجعل من صوم رمضان شاقا ومتعبا ً خاصة في المناطق الحارة مثل الرياض ونجد عموما.
ولكن نسأل الله أن يضاعف الأجر بقدر مضاعفة المشقة .
طبعا لن أجعل من تدوينة رمضان موعضة وتذكير بفضل رمضان وما فيه من الأجر والثواب للصائمين والقائمين
ولكن سوف اتحدث عن موسم الاكل في رمضان ومشاريع ((التسمين)) التي تحصل فيه. فكما يعلم الجميع أن رمضان كما هو موسم عمل وطاعات فهو موسم أكل إلى حد التخمه.
وكما قال الشاعر
ولو أني استطعت صيام دهري …. لصمت فكان ديدني الصيام
ولكن لا أصوم صيام قوم …. تكاثر في فطورهم الطعام
فأن وضح النهار طووا جياعا … وقد هموا إذا اختلط الظلام
وقالوا يا نهار لئن تجعنا … فان الليل منك لنا انتقام
ونامو متخمين على امتلاء … وقد يتجشئون وهم نيام
فقل للصائمين اداء فرض … إلا ما هذا فرض الصيام
ففي سفرة رمضان خاصة تنحسر الكبسات التي طوال العام تزدان بها الموائد ويحل محلها السمبوسة واللقيمات والحلى والشوربات …..الخ من الأطباق الرمضانية..
وهي عادة كل عام يكون رمضان موسم ((أكل و تسدح عند المسلسلات)).
وهذا بالتحديد ما يجعلني أعاني . فأنا انوي جعل رمضان هذا العام موسم حميه وتخفيف .
والخطة أن انزل من وزني عشرة كيلو اكتسبتها الأشهر الماضية وفي تصوري أن رمضان فرصه مواتيه لعمل هذا الرجيم
ولكن المشكلة تأتي بالإغراءات على الموائد الرمضانية وأنا معتاد على الضرب بخمس في موسوم الأكل الفضيل
تبدو العودة للنادي فكرة جيدة خاصة أن هناك متسع كبير من الوقت في رمضان للذهاب وحرق الكثير من السعرات الحراراية
مع الامتناع عن الحلويات والوجبات الدسمة .
من لديه خطة طريق لإنزال وزني أتمنى من إرشادي إليها أكن له من الشاكرين
وكل عام وانتم بخير
ههههههههه يا دب لا تحاول بس
يعني بتقول بتتحمل تشوف السمبوسه وتخليها؟؟
نصيحتي لك خربها واضرب باللقيمات
ووزنك لا يهمك منت ناحف ابد اعرفك دب
وش رايك اعزمك على الفطور؟
كل عام والجميع بخير
تلمحيه لكل الأعزاء الضيوف
واللي يآخذ على خاطره يرها في راسي
ليكن تعليقي تعليقك في الموضوع أو جزء منه أو إعتراض أو إستطراد
دون الإشـارة من قريب أو بعيد لعلاقه شخصيخه تربطنا بصاحب المونه
ستواء بوصف سيارته منزله او مكان عمله أو نوعه
أنا أعتقد ان أي شخص لديه مدونه سيورد فيه كل ما ليس عليه قيود سببيه من حياته وحتى توجهاته
وعموما إاكي أعني يا جاره فليس في المجلس غيري وغيرك يا أبل المجـد
فتحملني ,احسبها لي لا علي
نح في اول الشهر ولساني باقي ما تعود الصوم حى شوف لفيت ودرت على الموضوع لين عبيت الصفحه
غفر الله لي ولك
عشرة كيلو بس؟؟!!
كني اشوف كرشتك مترين قدام مثل اي سعودي
وانت عارف الكرشة رمز السعودي الاصيل
رجيم وفي رمضان ما في امل
اقول اذكر الله والعب بالنعمه وخل الرجيم بعدين
قال رجيم قال
كل عام والجميع بخير
اولا اشكرك على الدعوه
ثانيا لو كنت ادري انك دب ما جيت لكن يالله من اجل دعم الابداع
ثالثا تصفحت المدونه منتهى الابداع والجمال مواضيع شيقه وطرح منطقي
رابعا وهو الاهم اترك الاكل والسمبوسه واللقيمات وتنحف اعقل يابو المواعين
اقبلني صديق للمدونه
اولا مبارك عليك الشهر
وكل عام والجميع بخير
اما بالنسبه لفكرة التنحيف في رمضان مستحيييييييله وفر عليك المجهود ماراح تقاوم الوجبات بعد الصيام والجوع
انصحك تأجل الفكره بعد رمضاااان يكون أنسب
ماعون رجيم ويكون في رمضان مستحيل لأنه يكون الواحد صايم مايتحمل يشوف قدامه الفطور وخاصه اذا كان فطور متنوع فالافضل تخلي الرجيم بعد رمضان
اجل ناوي تنحف يالدووب
ما خربتك سمين..!!
شكلك ضارب بالكبسات بعدي
طيب الوعد بعد رمضان ومعي الميزان ونشوف
كل عام وانت طيب يالقاطع
اقول
اذا اعتاد الفتى خوض المنايا …. فاهون ما يمر به الصحون (( الوحول))
هي اقل من عشرة كيلو وابي انزلها
والوعد بعد رمضان يالهلالي انت وماجد
مع اني متحسف على موسم السمبوسه الفضيل يبي يروح علي لكن مو مشكله
الشهر مبارك ولو انها متأخرة
كل عام ياماعون وانت بخير
كل عام والأمة الاسلامية بخير
وانتي بخير اختي الجوهرة
تقبل الله مناك ومنك
اتمنى فقط الا يزيد وزني يا ماعون
كانك جازم تنحف أترك العجز وتعال العب معنا طائرة …وأبشرك شلنا الثيل وحطينا رمل ….ههه….علشان من جد تغرزززز
تقبل الله منا ومنكم
كل عام وانتم بالف خير ومبروك عليكم الشهر جميعاً ……
طبعاً من فوائد الصيام تخفيف الوزن وقلة الاكل بشكل عام ولكن تغيرت الفكره 180 درجه.
استمر في مشروعك (ولا تكثر السمبوسة والشغلات الحلوه هذي) 🙂
تحياتي
هلا ماعون ………………. احمد ربك بس على النعمه وربي ان الموضه الحين السمنه كل البنات يحبون الرجال المربرب بلا نحف بلا هم وسع صدرك وكل اللي تبي شفني انا من دخل رمضان وانا ما اتسحر الا من شواية الخليج مابووووووووووه زي الرزيزه يا ماعون سحور والفطورعاد اضرب بالسمبوسه واللقيمات والفينتو هههههههههههههههههه(الفيمتو)
ما لعب فينا الا الرز والكبسات
واذا جاء رمضان زاد الطين بله
لكن انا نزلت 2 كيلو حتى الان وباقي 3 او اكثر
مرحبا ماعون ،،، من سار على الدرب وصل ، حتى لو كنا في رمضان تخفيف الوزن أمر ليس بالصعب او المستحيل يحتاج فقط لإرادة قوية ،، عموما لتحقيق اي هدف يجب ان تعيش فترة مابعد تحقيق الهدف بمعنى ان تتخيل نفسك وقد انقصت وزنك ووصلت للوزن المطلوب بهذه الطريقة يبقى حماسك لتحقيق الهدف عالياً ، كذلك لا يغيب عن ذهنك عواقب السمنة واضرارها الصحية والنفسية .. وأخيراً دع الشاي الأخضر غير المحلى صديقاً لك وأدمن على رياضة المشي ولو لنصف ساعة يومياً. ولا تعر أذناً لأي محبط ولو كان صديقاً!
هلا أخوي ,عن تجربه شخصيه في هذا الشهر أنا الحمد لله نحفت 4 كيلو بدون مشي أو بذل أي مجهود ,الرجيم الرمضاني من أبسط مايكون أفطر تمر ومويه ثم أشرب لك شوربه شوي لا تكثّر وكلك كم سمبوسه فرن بدون زيت وأركض بعد التراويح نصف ساعه فالممشى وأهم شي _كف يدك عن الأكل _
بالتوفيق إن شاء الله
هههه
اذا قريت ردودكم احس اني وحيد القرن
هي كلها كم كيلو
عموما اشكركم على التشجيع وان شاء الله بنزلها
انا اتمرن كل يوم بالنادي ساعه تقريبا
المشكله اذا حطوا السفره اغراء منقطع النظير
السلام عليكم
كيفك ؟ << داخله غلط
دخلت عشان اقولك على طريقة تنحف فيها
على الفطور كل لين تشبع وبعدها لا عاد تاكل شي لين وقت السحور و وقتها لبن و تمر او مويه و حبه فاكهه
وان شاء الله ما يجي العيد الا وانت فله ههههههههههههههههههه
تحياتى لك
هههه
تصدقون فعلا حسيت اني اعاني وهي كلها كم كيلو
التعاطف معي خلاني اروح للمرايه اليوم اشوف الكرش كم سانتي
امي تقول كلك ملح ما يحتاج رجيم
لكن انا ملزم انزلهم
ماعون لبى قلبك طيعني بس كل لين يطلع الاكل من خشمك بلا رجيم بلا حركات دلع انت زيادتك كيلويين ما يسووو عليك لا تسمع بس كلام الموسوسين الله يا كريم يعطيك الصحه والعافيه ويكفيك شر عيون خلقه يارررب