غزليات شعبية ..!!
25 مايو, 2012
أسعد الله اوقاتكم بالخير والمسرات
كعادتي أغيب ثم أعود معتذرا عن انقطاعي بسبب انشغالي الدائم في العمل فليس هناك متسع من الوقت للتدوين والبحث.
هذه التدوينة ستكون عن “غزليات من الشعر الشعبي” والشعر الشعبي أو النبطي لا يقل جمالا عن الفصيح بل إن الشعبي سيد الساحة الشعرية الآن فلا يكتب الفصيح إلا القليل من الشعراء .
والغزل في الشعر الشعبي كثير وغزير وفي هذه التدوينة سأحاول أن أنتقي أجمله و أعذبه فيما وقع بين يدي أو أحفظه.
واتمنى من الإخوة القراء المشاركة بما لديهم حول الموضوع
وأعتذر مقدما عن ذكر بعض اصحاب القصائد لأني لا اذكرهم وما غالبا كتبت أو حفظت القصيدة دون ذكر صاحبها لضعف الوعي الأدبي ذلك الحين حيث اني جمعتها في سني المراهقة وغالب هذه القصائد كتبتها من تسجيل برنامج ” شجون الليل” الذي تبثه اذاعة الكويت قبل غزو العراق الذي قُتل خلاله المذيع ” محمد المطيري” وتوقف بسببه البرنامج وكان التسجيل أحيانا غير واضح.
ومحمد المطيري رحمة الله كان يمتلك صوت وإلقاء جميل يجعل من القصيده تقطر عذوبة وإحساس
………………………………………………………
لـيتـك تـعـيـش بواقـع الحـب لو يوم .. ولا تـشـوف لــوضعنا ذا نــهــايـه
بالحيل انا ياغاية النفس مــظــلوم .. محـتاج يالـغـالي لـعـطف ورعايـه
لــي الـسـهر ولـعـاذلـي لـذة الــنوم .. لــجـل حــبك مــا سـهــرنا هــوايـه
ماصابـني من نظرة العين مقسوم .. اســيـر حــبـك لا تـحــطـم رجــايه
ماكـل عـيـن ٍ تجرح القلب بسهوم .. وما كــل مـن يـرمي يـجــيد الرمايه
انا اشــهـد اني منـك يازين محروم .. معـك ابـتـديت وفي هـواك النهايه
…………………………………………………………….
ياللي غايب يـشهد اللـه فـقـدناك .. تعال بسم الحب جرحي خطيري
انا غريق الهوى هــات يمناك .. في زحمة امواجك تعذر مسيري
مشتاقلك بالحيل يا كود فرقاك .. تعال بسم الحب جرحي خطيري
ارفق بقلب تاـلي الليل ناداك .. وقتي حداني في هواك استجيري
عطني أمل يوم اللـه اعطاك .. لا ينقطع بيديك سلك الحريري
نسيتني والا ا تناسيت ممشاك .. والا انت مشغول برجا حب غيري
يا مستريح البال وشلون ننساك .. والشوق ناره تشتعل في ضميري
خذ روحي اللي هده الشوق تفداك .. عسى الفلك لا اخذتها يستديري
عبدالله العيوي
…………………………………………………………………………
اليا متى راحت حـياتـي وانا ارجـيك .. وياللـه لا تـقـطـع رجـا ً بك رجـيته
لـوشـفـت دمع عـيونـي اللي تراعيك .. هــلـت على الـمكـتوب ساعة قريته
ان كان جا مستقـبـلك مثـل ماضيك .. اقــول يا خــلاف ســعـي ٍ ســعـيته
ان كان تبغيني مثـل مـا انا ابــغيـــك .. لـزوم ٍ تـاطـا بالـوعـر مأ وطـيـته
وان كان حال الياس دون الرجا فيك .. اقــول ذا ذنـــب ٍ لنــفـسـتي جـنـيته
…………………………………………………………………..
لـو ان قـولـت “أح” تـبري المجـرح .. كـثـرت مـن قـول “أح” وابـريـت روحـي
مـيـر ان قولـت “أح” مالي بها صح .. زود ٍ علـى مــا بـي تـنـقـض جــــروحـي
……………………………………………………
ماتت حروفي وانا احط القلم وآشيل .. تعبت ألملم تعابيري وأجمعها
لاجيت بكتب (وداعآ) ياغلاي تسيل .. دمعات عيني وتجرحني مدامعها
أذكر وداعك وانا خايف وداعك حيل .. وكني لدنياي بوداعك أودعها
ياشوق قلبي لوتفيدالمراسيل .. لكتب وداعك بنبض القلب واطبعها
………………………………………………….
شفتك مع اللي صار غقبي حبيبك .. واحتارت العبره بعيني وصديت
مدري هي الصدفه لدربي تجيبك .. مدري انا اللي في دروبك تحريت
يا قلب جرحك سبته من طبيبك .. يا قلب ليتك بالوفاء مـا تماديت
ملكتني واقفيت ربــي حسيبك .. يا فا قـد الاحساس عـنـي تخليت
وش فايدة لا قلت عـني حبيبك .. وانت بحياتك يوم ما اظن حبيت
عبدالله العليوي
………………………………………………………………….
قبل الزعل ليتك لوضعي تفهمت .. مابيننا عشرة عمر لو تراعي
تـراك بحكمك علينا تسرعت .. خلك حليم و لا تصير اندفاعي
دامك بقلبي من سنين تحكمت .. ما شوف لهروج ٍ تجي منك داعي
كان الخطا مني فأنا لك تعذرت .. خلك حبيب ما يسرك ضياع
…………………………………………………….
جيتك يسابقني لشوفك خيالي .. يرسمك في فكر الهوى شوق وعناق
واشفيت غلي من فرقاك ليالي .. اسرق مرور الوقت والوقت سراق
تومي بي النشوه يمينى و شمالي .. ابثـلك اســرار المودة والاشواق
وتقول لي :غالي وانا اقول غالي .. كنه مسكرنا مــن الحـب ترياق
والا دريت إنــي وحيد ٍ لحالي .. حتى صرخت أقول: مشتاق مشتاق
أثر و جودك صوره في خيالي .. وانا ضحية طــول حرمان وفراق
مبارك الهاجري
…………………………………………….
في عيونك دمعه الفرقا قدر .. وفي عيوني وحي مخدوع الضمير
لا تقول الحظ خانك و انعثر .. ولا تقلل قـيمــة الحــظ الكيبر
خل عيني منك في دنيا السهر .. للجفا تختال بثياب الــحــرير
ما على الآمال من ظلم الدهر .. فيه يصير القاك و الا ما يصير
ظامي الوجدان واشواقك نهر .. اسقني من عذب معسول الغدير
الرموش السود والطرف الحور .. ليتها عــن لحظها لـــي تستخير
اول المشوار فـي حبك قهر .. واخر المشوار عمري به خطير
نشوة المفتون بك نشوة زهر .. ورد غصن ٍ عانقه نفح العبير
بدر عبدالمحسن
……………………………………….
يـا عـيـوني ناظريها و ادمعي .. شوفي الايام وش سوت بنا
هي هناي هي مناي ومطمعي .. ابعدت والا بها حضي دنا
كلامها ودي يعانق مسمعي .. ليتها ما تعرف اسمي من انا
لـجـل تاخذها سوالفها معي .. ويستعير الشوق لحظات الهنا
لو تظاهر بالصدود وتدعي .. حيرة العشاق مفاتيح المنى
ودعيها يا عيوني و ارجعي .. ينتصر للحب ياسي والضنا
ودعي بالشوق حب مودعي .. للهموم اللــي سحايبها عنا
حبنا ما صار مخلوف السعي .. والرجا بك طيف حلم ٍ مرنا
بدر عبدالمحسن
………………………..
خلاص لا ترجع ترانا سلينا .. ما كنت اصدق يوم اني انساك
في بعدكم يا ما عليكم بكينا .. واليوم ما تطري على البال ذكراك
انا ادري انك رغم صدك تبينا .. لا شك ناس ضدنا تقصر خطاك
خل الذي غير حنانك علينا .. يعطيك من قلبه ربع ما عطيناك
من سكرة حب المصالح صحينا .. حتى المجالس عفتها خوف طرياك
ودعت ماضي حبنا وانتهينا .. وقلب ٍ نسيته يـــوم لابد ينساك
باحلام ليلي لــو خيالك يجينا .. قضيت تالي الليل في دفن ذكراك
ذكراك يــا غدار هانت علينا .. حتى دموع العين فرحة بفرقاك
حب ٍ جديد غـيـر حبك لقينا .. حديتني جـعــل الليالي تحداك
عبدالله العليوي
…………………………………………..
احب من وصفه من الناس حليــاك .. واحب من يطري من النـاس طاريك
واحب من يخلص يازين ويـــــاك .. يـازيـن يـا مملـوح بـالحــب مــغـلــيك
واحــب درب وطــيته بممـشـــــاك .. اللــه يسهــل يـا حبـيـبـي ممـاشـــيك
واحب من زوله من الناس شرواك .. يـالــيـت ربــي للمــحـبه يـخـــلــيك
واحب لبس عن الناس غـطـــــاك .. يـسـتر جـمـالك عـن حــسود يـعـاديك
واحـب ظلٍ عـن الشمــس يـاقــاك يـحـمـيك مـن حـر على الـجسم يوذيك
واحب ثغر بـاسم فــي مـحـــيــاك .. مــن كـل وصــف حلوٍ شـفـته انا فيك
سـبحـان من هو في المخاليق سواك .. مــن كـل طـبــع زين يازين مـعـطـيك
……………………………………….
قـلـبي اللـي لـواه مـن الـصـواديف لاوي .. قـرحته اللـيـــــــــالي والهـموم الرديـه
واللـه اني بوسط التاس كــنـي خـلاوي .. مــن يلـوم المـفـارق عقب فرقا خويه
اشهــد ان المـفـارق من عـظـيـم البلاوي .. مــيـر هــذا نـصـــيـبك يالعيون الشقيه
اتـجلد واقـول انـي علـى البـعــد قـــاوي .. واللـه اعلـم بـقـلبٍ فـيـه الاشـواق حـيه
ليت لهـل الهـوى والحب قاضـي دعاوي .. كــان اداعــي عـيـون اللي فـراقه اذيه
لـيـن يـبري اللـي قـطـعـته البـــــكــاوي .. كـــــل مـا زاد بالـونات زادوه كــــيه
خالد الفيصل
…………………………………….
ماهو جفا لو شفتني عنك أبطيت .. عمر الجفــا ماراود النفس يمك
باسم الغلا ساكن وبالقلب حليت .. بقصى خفوقي مسكنك يوم ضمك
لا ما اتخلى عنك لو غبت وابطيت .. غلاك يسري بي مثل مسار دمك
……………………….
ياشوق انا عنك ضروفي حدتني .. مالي علــى المسيار يمك وسـيله
رجوآ وصالك يالغضـي بيدتني .. وطــالت وقلبي فـيـه مثل المليله
محبتك يالغـضـي وردتـــــنــي .. حوض المنيه بين يــــوم وليله
محبنك جارت علـــي واجهدتني .. مثل اللي عجزت عظامه تشيله
دارتبي الافـلاك لــيــن ابعدتني .. عـن صاحب ٍ واللـه مقبل بديله
كـــان الليالي المقبله ســــاعدني .. جيتك ولـــو عقب مده طويله
المشتاق
…………………………….
قـلي شي ٍ لقيته فـــــــــي هـواك .. غـير سهر العين بالليل الطويل
كل شي ٍ فـــــي سبيلك من فداك .. لو طلبت الروح لك مــاني بخيل
انتظرت وطال وقتي في رجاك .. لا تمنيني وانـــــــا وقتي قليل
باقي ٍ بعض الامل لي في وفاك .. لا تخلي الوصل ضمن المستحيل
لا تخليني فـــــي شك ٍ وارتباك .. لا تذللني وانــــــــــا ماني ذليل
يا سمي الليل وش لي في سماك .. غيمة ٍ ســـودا مـتى عني تزيل؟
لاجلكم تركت هـــــــذا وذك .. وانتحيت عن القرابه والخليل
……………………………………
عزالكلاام وعشت في محور الصمت .. صمتي عذاب ورغم هذا قبلته
اخـــاف رد الفعل لامــن تقدمت .. تنقض يدينه طي حبل فتلته
واعيش بالاحزان لـــو ما تظلمت .. للناس عن جرح بقلبي نقلته
عزالله انك بالهوى مـــااا ترحمت .. من منهلك ســـم التعاسه نهلته
لــو عتني يــامــا بـحـبـك تندمت .. عاشقك ما يوم عنيت و صلته
عايشت حبك فـي عذاب و توهمت .. انك تبادل من خفوقه دهلته
لا حل ليلي لــه مــن الشوق نادمت .. وافضيت له عن جسمي اللي نحلته
ومن صدفة الاقدار ياما تعلمت .. ليلي عذاب ولا جواب ان سالته
………………………………………………
ياكبر قدرك بالضمير ومقامك .. أبيع لأجلك كل مخلوق واشريك
كني أطيرمن الفرح لارتياحك .. لاصرت مستانس وهلت طواريك
تعجبني البسمه ولهجة سلامك .. أحبها لا أقبلت وأفز أحييك
تفرق على غيرك طريقة كلامك .. في ذمتي كل العرب ماتساويك
…………………………………………….
روحك غريبة في جسد يجمع أغراب .. حتى المشاعر في فؤادك غريبة
لاعشتك بدفتر ولاضمك كتاب .. وعمره خيالي ماسريتي بغيبه
إن قلت حلم/ قالت العين كذاب .. وإن قلت علم/ كيف لي وألتقي به
كنك سرابة تفترش أرض ألاهداب .. وإلا سحابة صيف يضمي لهيبه
في عينك اليمنى تراحيب وأعجاب .. وفي عينك اليسرى تردد وريبه
والبقية في تدوينة اخرى
على العكس في جازان لا يرون ان الشعر الشعبي شعراً وجل القصائد باللغة العربية الفصحى وانا محب ومتذوق لشعر الشعبي لكن هناك فقر شعري بالمنطقة .
جميل جدا ما قرأت اختيارك رائع لله اشهد ذوقك رائع ولا يكون الا بروعتك وجمالك تقبل شكري واحترامي وتقديري واعجابي